കണ്ണൂർ: ബുദ്ധിപരമായ വെല്ലുവിളികൾ നേരിടുന്ന ബഡ്സ് ബിആർസി വിദ്യാർഥികളുടെ കായികോത്സവം ബഡ്സ് ഒളിമ്പിയയുടെ രണ്ടാമത് പതിപ്പിനു കണ്ണൂരിൽ തുടക്കമായി.
ഇന്നലെ കണ്ണൂർ പോലീസ് പരേഡ് സിന്തറ്റിക്ക് ഗ്രൗണ്ടിൽ ആരംഭിച്ച മത്സരം ജില്ലാ പഞ്ചായത്ത് പ്രസിഡന്റ് ബിനോയ് കുര്യൻ ഉദ്ഘാടനം ചെയ്തു. മാർച്ച് പാസ്റ്റിൽ കണ്ണൂർ ജില്ല ഒന്നാം സ്ഥാനവും വയനാട് രണ്ടാം സ്ഥാനവും മലപ്പുറം മൂന്നാം സ്ഥാനവും കരസ്ഥമാക്കി.
ആദ്യദിനത്തിൽ 100 മീറ്റർ റേസ് ജൂണിയർ, 100 മീറ്റർ റേസ് സീനിയർ, ലോവർ എബിലിറ്റി ബോൾ ത്രോ ടു ഗോൾ പോസ്റ്റ്, 50 മീറ്റർ ഹയർ എബിലിറ്റി വീൽചെയർ റേസ്, ലോവർ എബിലിറ്റി സോഫ്റ്റ് ബോൾ ത്രോ, ഹയർ എബിലിറ്റി ബാസ്കറ്റ് ബോൾ ത്രോ, സ്റ്റാൻഡിംഗ് ബ്രോഡ് ജംപ് സബ് ജൂണിയർ എന്നിങ്ങനെ 15 മത്സരയിനങ്ങളിലാണ് വിദ്യാർഥികൾ മത്സരിച്ചത്.
സമാപന ദിവസമായ ഇന്ന് 30 ഇനങ്ങളിൽ മത്സരം നടക്കും. ഇന്ന് ഉച്ചകഴിഞ്ഞ് മൂന്നിന് സമാപന സമ്മേളനം മന്ത്രി എം.ബി. രാജേഷ് ഉദ്ഘാടനം ചെയ്യും. മന്ത്രി കടന്നപ്പള്ളി രാമചന്ദ്രൻ അധ്യക്ഷനാകും.